Garfield leikur Köngulóarmanninn í mynd fjögur

Andrew Garfield segir það draumi líkast að hafa hreppt hlutverk Péturs Parker í fjórðu Spider Man-myndinni.

Garfield tók við hlutverki köngulóarmannsins af Tobey Maguire sem lék í fyrstu þremur myndunum. Þær nutu mikilla vinsælda en sú þriðja og síðasta fékk heldur dræmar undirtektir hjá gagnrýnendum.

Garfield, sem er 27 ára, segist hafa undirbúið sig fyrir hlutverkið síðan hann var lítill drengur. „Mér líður eins og ég hafi undirbúið mig ansi lengi. Örugglega síðan á hrekkjavökunni þegar ég var fjögurra ára og klæddist mínum fyrsta Spider Man-búningi," segir hann.

Leikarinn segir að köngulóarmaðurinn snerti líf margra ungra drengja vegna þess að hann vill að réttlætið nái fram að ganga. „Öllum ungum drengjum finnst þeir vera sterkari innra með sér en útlitið segir til um og þeir óska þess að vöðvar þeirra væru nógu stórir til að stöðva allt óréttlætið."

Garfield bætir við að það sé heiður að taka þátt í Spider Man-myndinni. „Það er mikill heiður að vera hluti af þessum tákngervingi sem mér finnst mjög mikilvægur rétt eins og svo mörgum öðrum." Fjórða myndin um ævintýri köngulóarmannsins verður frumsýnd sumarið 2012.