Ætlar að sigrast á krabbameininu

Michael Douglas eru gefnar áttatíu prósent líkur á því að sigrast á krabbameini sem hann greindist með á dögunum. Hann er í baráttuhug.

Michael Douglas kveðst vera bjartsýnn á að honum takist að sigrast á krabbameini sem hann greindist með í hálsi í síðasta mánuði. Hann viðurkennir þó að bæði geisla- og lyfjameðferðin dragi úr honum kraft og hann komist ekki yfir allt sem hann langi til að gera yfir daginn.

Douglas var í einlægu viðtali við breska blaðið The Sun og sagðist hafa það ágætt. „Læknarnir mínir eru bjartsýnir. Ég er bjartsýnn. Auðvitað dregur þessi mikla meðferð úr manni kraft en það stóðu sig allir alveg frábærlega og lífið heldur áfram.“

Douglas hefur hins vegar ekki dregið sig algjörlega í hlé því hann mætti til Davids Letterman á dögunum og greindi þar frá því að hann væri með krabbamein á fjórða stigi. „Þú vilt vera á stigi eitt. En þeir gefa mér áttatíu prósent líkur,“ sagði Douglas en eiginkona hans, Catherine Zeta-Jones, og börnin þeirra, Dylan og Carys, hafa heimsótt leikarann á sjúkrahús í New York þar sem meðferðin fer fram.

Douglas birtist næst á hvíta tjaldinu í hlutverki Gordon Gekko í Wall Street II en Gekko er persónan sem einhverjir kynnu að halda fram að hefði verið fyrirmyndin að íslenska útrásarvíkingnum.