Lafhræddur við Liam Neeson

Ástralski leikarinn Sam Worthington fer með hlutverk í ævintýramyndinni Clash of the Titans ásamt stórleikurunum Liam Neeson og Ralph Fiennes. Worthington sló rækilega í gegn í kvikmynd James Cameron, Avatar, en þrátt fyrir það segist hann hafa kviðið því mjög að leika á móti Neeson.

„Þetta var mjög ógnvekjandi. Hann er stóri strákurinn og þegar maður fær að leika með stóru strákunum þá þegir maður og lærir. Liam er mjög þokkafullur leikari, hann er herramaður og birtist sem mikið afl á kvikmyndaskjánum. Ég lærði mjög mikið af því að starfa samhliða honum. Maður fylgist vel með því sem hann gerir og hann er einnig örlátur á góð ráð. Það sama má segja um Ralph Fiennes. Samanlagt hafa þeir komið að næstum hundrað kvikmyndum, þannig að fyrir byrjanda eins og mig var þetta afar lærdómsríkt,“ sagði Worthington í viðtali við tímaritið Collider.

Leikarinn efnilegi segist jafnframt reyna að setja nokkuð af sjálfum sér í hverja persónu sem hann leikur, á þann hátt verði þær trúverðugri. „Starf leikarans er að sjá til þess að áhorfandinn fái peninganna virði. Það er mitt starf.“