Kirkjustrákur frá Njarðvík

Rapparinn Ástþór Óðinn gaf út plötuna Both Ways í desember. Öfugt við marga á hann í engum vandræðum með að skilgeina tónlistina sína.

„Ég myndi segja að þetta væri sniðskotið hiphop í bland við altern­ative electro. Í dag er helsti áhrifavaldurinn OutKast. Bítlarnir hafa líka mikil áhrif á mig. Textarnir sérstaklega. Ég er mikið í ást og friði og hamingju.“

Ekkert gangsta-rapp, sem sé?

„Nei, ég er enginn gangster svo maður getur voða lítið verið að pæla í því. Ég er eiginlega bara kirkjustrákur, en reyndar frá Njarðvík sem er þó allavega eitthvað. Gangster-rapp passar ekki á Íslandi. Kannski eftir 10 ár samt, svona miðað við hvernig ástandið er að þróast.“

Ástþór er 28 ára „gamall refur“ eins og hann orðar það. Hann gerði plötuna Operation On The Mic undir nafninu Iceberg og var í dúettinum 2 leikmönnum. „Við gáfum út eina plötu sem var til á Tónlist.is og í búðum í Reykjanesbæ. Hún fór ekkert lengra.“

En nú er markið sett hærra. Platan er til stafræn á Tónlist.is og Gogoyoko, en Ástþór segist ætla að gefa hana út opinberlega á CD seinna. Lög af plötunni eru í spilun á Rás 2, FM og myndbönd á Nóva TV og Skjá einum. Þau má nálgast á You Tube. En er Ástþórs-nafnið nógu gott á rappara?

„Tja, það er nú bara það sem ég heiti, Ástþór Óðinn, og ég nota það bara!“ segir hann. „Kannski maður taki upp eitthvað alþjóðlegra seinna, það er aldrei að vita. Ég hef alveg fengið einhver skot út af forsetaframbjóðandanum Ástþóri, en það býttar nú ekki miklu máli. Maður haggast ekki við það.“

Ástþór Óðinn kom nánast einn að allri gerð plötunnar, samdi, flutti og tók hana upp. Næstu uppá­komur Ástþórs eru á Hverfisbarnum 17. febrúar með rapparanum Ramses frá Kópavogi og í Glóðinni í Reykjanesbæ 19. febrúar. Þar kemur Ramses einnig fram og Stjörnuryk, 3. Hæðin, Dj Ace og Orri Err og Siggi Breiðfjörð þar að auki.drgunni@frettabladid.is