Hönnuðir og verslun Rauða krossins snúa bökum saman

Fimm hönnuðir sem sýna á tískuhátíðinni Reykjavík Fashion Festival sem fer fram dagana 19. og 20. mars munu taka að sér að sjá um gluggaútstillingu í verslun Rauða krossins við Laugaveg.

„Strákur að nafni Richard Foley kom með þessa skemmtilegu hugmynd og okkur sem að hátíðinni stöndum fannst spennandi að tengja tísku við góðgerðarstarf á þennan hátt. Hugmyndin er sú að hver hönnuður tekur að sér að gera eina útstillingu í glugga verslunarinnar og nota til þess flíkur úr versluninni. Hver hönnuður hefur viku til umráða og hófst þetta með Thelmu Design á fimmtudaginn síðastliðinn. Það verður mjög áhugavert að sjá hvernig hver og einn mun hanna gluggann því þau fá algjörlega frjálsar hendur,“ segir Stefán Svan Aðalheiðarson, verkefnastjóri verkefnisins.

Þeir hönnuðir sem þátt taka eru Mundi, Birna, Nikita, Thelma Design og E-Label og verður án efa skemmtilegt að leggja leið sína á Laugaveginn næstu fimm vikurnar og skoða útstillingar hönnuðanna.

- sm