Flúði frá Skotlandi

Leikarinn og hjartaknúsarinn Brad Pitt er ekkert alltof spenntur fyrir því að heimsækja Skotland eftir að hann lenti í vandræðum þar áður en hann varð frægur. Pitt var á ferðalagi um Skotland og kynntist þar konu í borginni Glasgow sem átti brjálaðan fyrrverandi kærasta.

„Ég fór til Skotlands og ferðaðist þar um fyrir mörgum árum. Ég fór út um allt og sá heilan helling. Edinborg og Glasgow voru eftirminnilegir staðir og arkitektúrinn þarna er stórmerkilegur,“ sagði Pitt.

„Þegar ég var í Glasgow kynntist ég stelpu. Svo illa vildi til að hún var fyrrverandi kærasta einhvers rudda. Á endanum þurfti ég að flýja borgina vegna þess að ég fékk slæmt augnaráð frá náunga á bar,“ sagði hann.

Leikarinn útilokar þó ekki að taka upp kvikmynd í Skotlandi ef hlutverk sem hann tekur að sér krefst þess.