Vissi ekki af skilnaðinum

Fyrirsætan Elizabeth Hurley og eiginmaður hennar, indverski viðskiptajöfurinn Arun Nayar, hafa skilið að skiptum eftir að Hurley sást kyssa ástralska krikketleikarann Shane Warne.

Eftir að málið var gert opinbert í breskum tímaritum kom Hurley fram og sagði að hún og Nayar hefðu verið skilin í nokkra mánuði. US Weekly heldur því fram að þetta sé ekki alls kostar rétt því Nayar vissi ekki til þess að hann og Hurley væru skilin þegar hún sást með Warne.

„Þau hafa átt í erfiðleikum í þónokkurn tíma, en Arun var ekki tilbúinn til að leggja árar í bát. Liz var aftur á móti löngu búin að gefast upp en hafði ekki fyrir því að segja eiginmanni sínum frá því. Í staðinn fór hún og átti vingott við annan mann og sagði Arun ekki sannleikann fyrr en upp um hana komst. Hann er miður sín, honum finnst Liz hafa niðurlægt hann opinberlega,“ var haft eftir heimildarmanni. Sá segir jafnframt að Nayar óttist að hann fái ekki að hitta son Hurley eftir skilnaðinn. „Arun og Damian eru mjög nánir og Arun óttast að missa tengsl við drenginn eftir skilnaðinn.“