Scorsese stýrir sjónvarpsseríu

Hinn heimsfrægi Martin Scorsese er einn af leikstjórum nýrrar sjónvarpsþáttaraðar, Boardwalk Empire, sem hefur göngu sína á Stöð 2 í haust. Höfundur þáttanna er Terence Winter, hinn sami og stóð á bak við hina vinsælu mafíuþætti, Sopranos.

Boardwalk Empire kemur úr smiðju sjónvarpsstöðvarinnar HBO eins og Sopranos og gerist í Atlantic City árið 1920 þegar bannárin eru að hefjast í Bandaríkjunum. Þá lagði ríkisstjórnin blátt bann við sölu áfengis í landinu, sem varð til þess að glæpagengi spruttu upp eins og gorkúlur. Vegna staðsetningar sinnar var Atlantic City kjörin til að smygla áfengi en borginni stjórnaði Enoch „Nucky“ Thompson sem Steve Buscemi leikur. Á meðal kunnra glæpmanna sem koma við sögu í þáttunum eru Al Capone, Lucky Luciano og Arnold Rothstein.

Þættirnir eru byggðir á bókinni Boardwalk Empire: The Birth, High Times and Corruption of Atlantic City eftir Nelson Johnson.