Eldsupptök á Hellissandi talin vera helluborð

Talið er að það hafi kviknað í út frá helluborði í húsi á Hellissandi í nótt. Þrjú systkini voru á heimilinu þegar eldurinn kom upp rétt fyrir klukka þrjú í nótt.

Þau vöknuðu við reykskynjarann og náðu að forða sér út úr logandi húsinu og hringja á slökkviliðið. Slökkviliðið kom stuttu síðar en mikinn reyk lagði frá húsinu þegar þeir komu á vettvang.

Slökkviliðsmönnum tókst fljótlega að ná tökum á eldinum og slökkva hann.

Um er að ræða einbýlishús en stór hluti hússins er ónýtur samkvæmt varðstjóra lögreglunnar í Snæfellsbæ.

Enginn vafi leikur á því að reykskynjarinn bjargaði lífi systkinanna sem öll voru sofandi þegar eldurinn kviknaði í húsinu.