Grunaðir kókaínsmyglarar áfram í gæsluvarðhaldi

Hæstiréttur staðfesti í dag úrskurð héraðsdóms þess efnis að tveir menn sem grunaðir eru um stórfelldan innflutning á hreinu kókaíni hingað til lands skuli sæta áframhaldandi gæsluvarðhaldi til 18. júní næstkomandi.

Mennirnir voru handteknir þann tíunda apríl eftir að lögreglan lagði hald á um 1600 grömm af mjög hreinu kókaíni. Efnin voru flutt í ferðatöskum frá Alicante á Spáni og fylgdist lögregla með mönnunum þegar þeir sóttu efnið til þess sem hafði flutt það inn og fóru með það heim til annars þeirra.

Þar fylgdist lögregla með því þegar mennirnir áttu við og opnuðu töskurnar sem efnin voru geymd í. Annar mannanna hefur játað aðild sína að málinu í yfirheyrslum og viðurkennt að hafa fengið burðardýr til þess að flytja efnin til Íslands. Hinn maðurinn hefur hins vegar neitað sök.