FM Belfast fær útreið á Hróarskeldu

Íslenska sveitin FM Belfast fékk lægstu einkunn allra þeirra sveita sem spiluðu á Hróarskeldu þetta árið.

Í opinberu veftímariti hátíðarinnar, Orange Press, fær FM Belfast tvær stjörnur í einkunn af fimm - tvær aðrar sveitir fengu jafnframt tvær stjörnur og er það versta einkunnin sem gefin var á hátíðinni í þetta skiptið. Hér má lesa dóminn.

„Þegar hljómsveitin er upp á sitt besta er tónlistin heillandi á sinn barnalega hátt en þegar hún er hvað verst er hún nálægt því að hljóma eins og leiðindagaul. Því miður féll frammistaðan á laugardeginum oft í síðarnefnda flokkinn," segir í gagnrýni Orange Press tímaritsins sem var gefið út á hverjum degi hátíðarinnar.

Þar segir jafnframt: „Til þess að halda uppi orðspori sínu sem hress og skemmtileg tónleikasveit reyndi hljómsveitin að fá áhorfendur til að taka þátt í tónleikunum en gat því miður ekki hulið grundvallarvandamálið: FM Belfast reyndi að ná til allra og féll þess vegna í þá gryfju að segja lélega brandara og spila kjánaleg lög eftir aðra. Þegar það brást var ekkert annað eftir en þunn raftónlist og hrúga af fólki hlaupandi um á sviðinu án þess að spila á hljóðfærin sín."