Senda börnin á Diskóeyju

„Það dásamlega við krakka er að þeir koma ekki að borðinu full af fordómum hvað sé rétt og skemmtileg. Þau finna þetta á sér,“ segir þúsundþjalasmiðurinn Óttarr Proppé.

Óttarr vinur að barnaplötu ásamt Baggalútinum Braga Valdimari Skúlasyni og Kidda í Hjálmum. Sögumaður á plötunni verður enginn annar en Sigtryggur Baldursson. „Þetta er ákveðin saga sem við Bragi kokkuðum upp saman um krakka sem eiga á hættu að verða leiðinleg, þegar það kemst upp að þau langar til að verða eignaumsýslufræðingar og lögfræðingar þegar þau verða stór,“ segir Óttarr. „Þá eru þau send í skóla prófessorins á Diskóeyju. Þar er skemmtun og gleði kennd.“

Óttarr fer með hlutverk prófessorins, en hann hefur brugðið sér í allra kvikinda líki á söngsviðinu - síðast sem söngvari einnar mögnuðustu hljómsveitar landsins; Dr. Spock. en óttast Óttarr ekki að börnin hræðist rokkskrímslið sem hann getur verið?

„Ég hef fundið fyrir því í gegnum tíðina að krakkarnir hafa mjög gaman af því sem maður er að gera - eftir því sem ýktari karakterar eru í gangi,“ segir hann. „Þó maður sé að klæða sig upp fyrir fullorðna þá skilja krakkarnir það betur en hinir sem eldri eru.“ - afb