Margeir sjarmerar Svíana

Plötusnúðurinn Margeir hefur komið reglulega fram á næruklúbbnum Berns Salonen undanfarið. Klúbburinn er vel þekktur í sænsku skemmtanalífi og þar sjást sænsku konungsbörnin gjarnan skemmta sér.

„Ég hef verið að spila þarna reglulega síðustu tvö til þrjú ár,“ segir plötusnúðurinn Margeir Ingólfsson aðspurður hvað hann sé að gera á einum af frægustu næturklúbbum Stokkhólms, Berns Salongen. Fréttablaðið rakst á miklar stemningsmyndir sem voru teknar á meðan Margeir var að spila og virtust Svíarnir skemmta sér vel.

Næturklúbburinn er vel þekktur í sænsku skemmtanalífi og þangað venja komur sínar helstu stjörnur Svía. Sænsku konungsbörnin sjást gjarnan á þessu stað þegar þau kíkja út á lífið.

Margeir gerði samning við eigendur staðarins fyrr á þessu ári um að koma reglulega og spila. Staðurinn gefur sig út fyrir að vera með rjómann í plötusnúðageiranum og Margeir því í góðum hópi.

„Ég flýg út á 6-8 vikna fresti og spila. Þetta er rosalega flottur staður sem tekur um 2.000 manns og oftast mikið stuð,“ segir Margeir nýkominn heim eftir vel heppnaða helgi í Stokkhólmi. „Fyrst þegar ég byrjaði að spila í Svíþjóð fannst mér Svíarnir frekar vera úti á lífinu til að pósa og líta vel út en að skemmta sér og dansa. Nú er ég búinn að finna út hvernig á koma þeim í stuð og það var allt brjálað um helgina. Fólk dansaði uppi á borðum með hendur upp í loft.“ Sænsku eigendurnir hafa hrifist svo af töktum Margeirs bak við DJ-borðið að þeir hafa nú boðið honum að koma oftar út í mánuði en hann er að íhuga boðið. „Það er nú bara spurning hvort maður hafi tíma aflögu enda er ég í annarri vinnu og með fjölskyldu,“ segir Margeir sem hefur þó heillast af Stokkhólmi.

Berns Salongen er bæði hótel, veitingastaður og skemmtistaður. Þar eru haldnir flestir stórviðburðir í sænsku skemmtanalífi, til dæmis sænska Grammy-verðlaunahátíðin. Einnig hafa stórstjörnur á borð við Missy Elliot og Jay Z haldið stór partí á Berns eftir sína tónleika í Stokkhólmi. Berns er einnig bakhjarl sænsku tískuvikunnar sem haldin er tvisvar á ári. alfrun@frettabladid.is