Þyrla gæslunnar flutti veikan mann frá Vestmannaeyjum

Landhelgisgæslan þurfti að flytja veikan mann frá Vestmannaeyjum til Reykjavíkur í nótt. Samkvæmt upplýsingum frá Landhelgisgæslunni þá barst henni tilkynning klukkan hálf fjögur í nótt.

Tilkynningin kom í gegnum Neyðarlínuna frá lækni í Vestmanaeyjum.

Um var að ræða veikan mann sem flytja þurfti strax til Reykjavíkur. Eftir samráð við þyrlulækni var þyrluvakt kölluð út. Nokkur bið varð á flugtaki þar sem beðið var eftir að ástand sjúklings yrði stöðugra fyrir flutning.

Fór þyrla Landhelgisgæslunnar TF-GNÁ í loftið rétt tæplega hálf sex og var lent í Eyjum um 20 mínútum síðar þar sem sjúklingur var undirbúinn og síðan fluttur yfir í þyrluna.

Þyrlan var svo lent í Reykjavík rétt rúmlega sjö. Þar beið sjúkrabíll sem flutti sjúkling á spítala.

Báðar sjúkraflutningavélar Flugfélags Vestmannaeyja eru óflughæfar yfir helgina og var því leitað til Landhelgisgæslunnar.