Semja tónlist í gegnum Skype

„Þetta verður vonandi besta og flottasta gigg sem við höfum spilað, ef allt gengur eftir,“ segir Addi, gítarleikari Sign.

Hljómsveitin spilar á Íslandi í fyrsta sinn í langan tíma á tónleikum á Nasa 9. apríl. Þar koma einnig fram Cliff Clavin, For a Minor Reflection, Noise, Ten Steps Away og Nevolution og er miðasala hafin á Midi.is. Allar sveitirnar eiga það sameiginlegt að vera að undirbúa nýja plötu. Plata Sign verður öll sungin á Íslandi og er væntanleg fyrir jól.

Nýr trommari, hinn sænski Jon Skäre, er genginn til liðs við Sign í staðinn fyrir Egil Rafnsson og verða þetta fyrstu tónleikar hans með sveitinni. Hann hefur þó enn sem komið er aðeins æft með söngvaranum Ragnari Sólberg, sem er búsettur í Svíþjóð. „Hann er ruddalegur,“ segir Addi um nýja trommarann. „Þeir æfa bara tveir úti í Svíþjóð. Ég og restin af bandinu æfum hérna heima.

Við fáum einn dag saman áður en tónleikarnir eru,“ segir hann pollrólegur. Að minnsta kosti tvö ný lög á íslensku verða frumflutt á tónleikunum og eitt á ensku. „Ég og Ragnar erum búnir að vera að semja á Skype, helvíti flottir. Það gengur bara mjög vel.“

Sign ætlar að spila í Víðistaðaskóla í heimabæ sínum Hafnarfirði 12. apríl fyrir þá sem komast ekki inn á tónleikana á Nasa. -fb