Tekin upp í Svíþjóð

Eins og flestum er kunnugt vinnur leikstjórinn David Fincher nú hörðum höndum að því að undirbúa tökur á myndinni, The girl with the dragon tattoo, sem er byggð á metsölubókinni Karlar sem hata konur eftir sænska höfundinn Stieg Larsson.

Flestir bjuggust við því að Fincher myndi laga söguþráðinn og stemningu kvikmyndarinnar að bandarískum aðstæðum og umhverfi en því vísar hann á bug. Myndin verður tekin upp í Stokkhólmi og bænum Uppsölum rétt fyrir utan höfuðborgina. „Það er ekki hægt að skapa magnþrunginn og dularfullan sænskan vetur í Seattle. Við verðum að gera þetta alvöru,“ segir Fincher um þessa ákvörðun sína. Það mun því verða stjörnufans í Stokkhólmi á meðan á upptökum stendur og Svíarnir vafalítið spenntir yfir þessu.

Fincher, sem er hvað þekktastur fyrir að hafa leikstýrt myndinni The Curious Case of Benjamin Button, hefur alltaf verið þögull sem gröfin um myndina og vill ekki mikið gefa út á fleiri atriði varðandi myndina.

Á dögunum var staðfest að leikarinn Daniel Craig mun leika blaðamanninn óhrædda, Mikael Blomkvist, en ekkert hefur komið í ljós hver leikur pönkaða tölvusnillinginn Lisbet Salander en ungar Hollywood-leikkonur virðast slást um hlutverkið. Myndina á að frumsýna í desember 2011.