Gillz er fórnarlamb eigin velgengni

„Ég skellti mér til Manchester til að horfa á United rúlla yfir Liverpool og á meðan verður allt vitlaust á klakanum," segir Egill „Gillzenegger" Einarsson rithöfundur. Eftir að Fréttablaðið sagði frá því að Egill hefði sótt um inngöngu í Rithöfundasamband Íslands hefur komið upp nokkur kurr meðal rithöfunda. Ekki má ólíklegt telja að yfirlýsingar hans um að seilast til áhrifa innan sambandsins ráði þar nokkru um.

Smásagnahöfundurinn og bloggarinn Ágúst Borgþór Sverrisson, oft nefndur Bloggþór, ritaði á DV.is að hann hefði ekkert á móti inngöngu Gillzeneggers í Rithöfundasambandið, en hann taldi Gillz og Fréttablaðið sýna rithöfundum landsins virðingarleysi, yfirgang og hroka með umræddri frétt. Til að mynda virtust áform Gillzeneggers um að „kjöta" rithöfundinn Sjón upp ekki falla í kramið hjá Ágústi Borgþóri.

„Þetta er bara gjald velgengninnar. Maður fær á sig hælbíta og hýenur," segir Egill þegar hann er spurður út í skrif Ágústs. „Ég hef annars verið að reyna að komast að því hver þessi maður er. Ég fæ ekki betur séð en að þetta sé sami rasshausinn og hótaði því fyrir nokkrum árum að hætta að blogga ef hann seldi ekki 300 eintök af bók sinni. 300 eintök! Nú, hann skeit upp á bak og seldi 150 eintök. Ef þetta er sami maðurinn, þá skil ég ekki af hverju hann er enn að skrifa. En hitt er öruggt, að ef Ágúst Borgþór er í Rithöfundasambandinu þá er augljóslega þörf á að ég mæti og taki þar til hendinni."

Að sögn Ragnheiðar Tryggvadóttur, framkvæmda­stjóra Rithöfundasambandsins, hefur umsókn Egils ekki enn verið tekin fyrir hjá inntökunefndinni. Það verði að líkindum ekki fyrr en í enda október. „Hann verður bara að bíða rólegur, hann fær enga flýtimeðferð," segir hún.- hdm