Geri Halliwell: Robbie bjargaði mér frá búlimíunni

Geri Halliwell sem gerði garðinn frægan með stúlknasveitinni Spice Girls og var þekkt sem "rauðhærða kryddið", segir að Robbie Williams hafi bjargað lífi sínu þegar hún þjáðist af búlimíu, eða lotugræðgi.

Geri ræddi vandamálið í viðtali á dögunum en þeir sem þjást af lotugræðgi éta á sig gat og kasta síðan upp til þess að berjast við þyngdina.

Geri segist hafa verið svo langt leidd af sjúkdómnum að hún óttaðist um líf sitt. Eftir að hún hætti í Spice Girls árið 1998 vingaðist hún við Robbie Willams, sem sjálfur hafði hætt í strákabandinu Take That.

„Robbie vissi um vandamál mitt og hann ráðlagði mér að leita hjálpar," segir Geri í viðtali við stjörnublaðamanninn Piers Morgan. „Hann sagði mér að fara í meðferð og það gæti hafa bjargað lífi mínu.," bætti stjarnan við með tárin í augunum.

„Ég mun ávallt vera honum þakklát," sagði hún að lokum og bætti því við að í dag sé hún hamingjusöm og við hestaheilsu.