Grunur um að ríkissjóður hafi verið svikinn um skatt

Ríkisskattstjóri hyggst skoða hvort hlutabréfakaup, sala fyrirtækja og eignarhaldsfélaga hafi verið talin fram. Grunur leikur á að ríkissjóður hafi oft verið svikinn um skatt af hagnaði af þessum viðskiptum. Til stendur að skoða fjögurra ára tímabil líkt og gert var við framtöl einstaklinga. Í vikunni kom fram hjá Greiningardeild Ríkisskattstjóra að einstaklingar hafi ekki gert grein fyrir sölu á hlutabréfum sem nam 127 milljörðum króna á framtölum sínum fyrir árin 2004 til 2008.

Gera má ráð fyrir að þar leynist nokkuð af ósóttum skattstofnum en eftir er að draga frá þessari upphæð kaupverð hlutabréfanna. Á þá upphæð leggst svo 10% fjármagnstekjuskattur en Ríkisskattstjóri hefur auk þess heimild til að leggja á 25% álag til viðbótar hafi menn svikist um að gefa upp hagnaðinn. Þá leikur grunur á að lögaðilar; eins og fyrirtæki og eignarhaldsfélög, hafi einnig í ríkum mæli svikist um að gefa hlutabréfaviðskipti sín upp í framtölum og því ekki greitt fjármagnstekjuskatt af hagnaði af viðskiptunum.

Til stendur að gera stikkprufu á nokkrum lögaðilum áður en ákveðið er hvort ráðist verði í nánari skoðun á málinu. Það yrði gert með því að bera saman gögn sem hafa borist frá bönkunum; t.a.m. kennitölur lögaðilanna, umfang og fjölda viðskipta, við ársreikninga.

Ekki er enn hægt að segja til um hversu miklu þetta gæti skilað í ríkiskassann en ljóst er að lögaðilar áttu í umfangsmiklum viðskiptum með hlutabréf í góðærinu og hagnaður af þeim nam gríðarlega háum fjárhæðum.