Lúxussnekkjan Maríu fundin

Lúxussnekkjan Maríu er fundin en hún liggur við akkeri við spænska bæinn Vilanova i la Geltrú sem er um 40 kílómetra frá Barcelona. Bærinn er annálaður fyrir fallega strönd sem heitir Sitga.

Fyrr í dag ræddi Vísir við Magnús Guðmundsson, forstjóri Banque Havilland í Lúxemborg, sem sagðist ekkert vita um afdrif lúxussnekkjunnar en um hana var fjallað í tölvupóstum í Rannsóknarskýrslu Alþingis.

Þar kom fram að Magnús sendi tölvupósta í febrúar 2008 vegna lúxussnekkjunnar Maríu. Pósturinn var stílaður á þá Ágúst og Lýð Guðmundssyni, Hreiðar Má Sigurðsson, Steingrím Kárason, Ármann Þorvaldsson og Sigurð Einarsson.

Magnús var spurður hvað varð um snekkjuna en hann svaraði þá stuttaralega. "Ég hef ekki hugmynd um það." Hann sagði ekkert óeðlilegt við stórútgerð útrásarvíkinganna. "Menn nota sína peninga eins og þeir vilja..."

Snekkjan er til sölu á heimasíðu Superyachttime.com en uppsett verð eru rétt tæpar tuttugu milljónir evra eða um þrír og hálfur milljarður króna. Svo virðist sem snekkjan hafi ekki enn verið seld.

Snekkjan er ekki skráð á auðmennina heldur félagið Ocean Independence UK limited. Meðal eiganda þess fyrirtækis er snekkjusölumaðurinn Nicholas Dean. Því má leiða líkur að því að hann sé að reyna að selja snekkjuna frægu fyrir auðmennina. Snekkjan er hin glæsilegasta en Giorgo Armani hannaði innviði hennar.

Samkvæmt heimildum Vísis þá er fólk um borð í snekkjunni. Það er hugsanlega með hana á leigu, en það kostar litlar 200 þúsund evrur á viku samkvæmt verðhugmyndum auðmannanna sem vildu selja hana ef þeir yrðu fátækir.