Sigraði í fegurðarsamkeppni hjákvenna Tiger Woods

Barþernan Jamie Jungers sigraði fegurðarsamkeppni á milli hjákvenna Tigers Woods í sjónvarpsþætti útvarpsstjörnunnar Howard Stern á dögunum. Stern, sem er frægur fyrir að vera óforbetranlegur, fékk hjákonur golfarans til þess að mæta í þáttinn til þess að keppa um það hver væri hin sanna hjákona Tiger Woods.

Keppnin var nokkurn veginn eins og fegurðarsamkeppni. Stúlkurnar sprönguðu um á bikiníi og svöruðu spurningum um ástarsambandið sitt við Tiger Woods sem hefur lent í talsverðum vandræðum eftir að eiginkonan hans fékk nóg af hjásvæfunum og málið komst í fjölmiðla.

Auk Jamie Jungers mættu þær Loredanna Jolie og Jamie Grubbs einbeittar til leiks. Klámmyndaleikkonurnar Holly Sampson og Jocelyn James, sem segjast einnig hafa átt í ástarsambandi við golfarann óseðjandi, neituðu hinsvegar að mæta á þeim forsendum að þær vildu ekki auka á niðurlægingu Tigers.

Jamie er fyrrverandi fylgdarkona og lýsti því í keppninni hvernig Tiger hefði kynnst henni. Hún sagði að hann hefði kallað sig litla kaffibollann sinn.

Þá fullyrti hún að hann hefði viljað horfa á hana í ástarleik með annarri konu á meðan hann horfði á ástaratlotin álengdar klæddur jakkafötum.