Forsetafrúin krefst afsökunarbeiðni frá Telegraph

„Dorrit er mjög sár yfir þessum alranga fréttaflutningi sem birtist í þessu breska blaði og í Fréttablaðinu. Í honum felst aðför að mannorði hennar," segir Örnólfur Thorsson forsetaritari.

Fullyrt var í breska blaðinu Sunday Telegraph á dögunum að forsetafrúin Dorrit Moussaieff og kaupsýslumaðurinn Vincent Tchenguiz hafi átt í ástarsambandi.

Haft var samband við blaðamanninn Jonathan Russell sem sagðist telja að sambandið hafi átt sér stað á níunda áratug síðustu aldar. Þá er því haldið fram að Dorrit hafi kynnt bræðurna Vincent og Robert Tchenguiz fyrir íslenska fjármálaheiminum.

Þeir fengu lán upp tæpa 300 milljarða króna frá Kaupþingi í útrásinni og hafa gert yfir 400 milljarða skaðabótakröfu í þrotabú bankans. Örnólfur segir að fullyrðingarnar séu báðar alrangar.

„Hún hefur hvorki átt í ástarsambandi við þennan mann né kynnt hann fyrir íslenskum bankamönnum," segir hann. „Hún hefur falið lögfræðingi sínum að hafa samband við blaðamanninn og blaðið og fara fram á formlega afsökunarbeiðni ásamt því að fréttin sé dregin til baka."

Fréttablaðið hafði samband við Jonathan Russell, höfund fréttarinnar í Sunday Telegraph, í kjölfarið á yfirlýsingu frá forsetafrúnni. Spurður hvort hann stæði við fréttina sagðist hann hafa skrifað hana fyrir tveimur vikum. Þá hafi ekki borist beiðni um leiðréttingu og að þar við sæti.

Vikublaðið Sunday Telegraph er sunnudagsútgáfa dagblaðsins Daily Telegraph og er gefið út hátt í 530.000 eintökum. Daily Telegraph er víðlesnasta dagblað Bretlands þegar götublöð á borð við The Sun eru ekki talin með.

Blaðið skýtur þar með dagblöðum á borð við Times og Guardian ref fyrir rass. Aðeins þessi þrjú gamalgrónu blöð: Daily Telegraph, Times og Guardian eru viðurkennd af breska ríkinu sem „paper of record" - eða blað sem stundar fagmannleg vinnubrögð og er til þess fallið að birta opinberar tilkynningar.

atlifannar@frettabladid.is