Hafnaði í 14. sæti á fyrsta heimsmeistaramóti barna

Hin níu ára gamla Sesselja Sif Óðinsdóttir tók fyrir skemmstu þátt í fyrsta heimsmeistaramóti barna í fitness sem fram fór í Slóvakíu. Sesselja Sif er dóttir Kristínar Kristjánsdóttur, Íslandsmeistara kvenna í fitness, og stjúpdóttir Sigurðar Gestssonar, vaxtarræktarkappa.

„Æfingarnar byggjast mest á fimleikum og dansi sem sýna bæði styrk og liðleika þátttakenda. Krakkarnir koma einnig fram á stuttbuxum en mega til dæmis ekki nota farða eða annað slíkt eins og viðgengst í fullorðinshópum," útskýrir Sigurður og segir Sesselju Sif hafa staðið sig með prýði á mótinu. „Keppendur voru tæplega hundrað og skiptust nokkuð jafnt í þrjá aldursflokka. Sesselja var í flokki með nokkrum bestu fimleikastúlkum heims og lenti í fjórtánda sæti í flokki átta til níu ára, þannig að hún stóð sig mjög vel stelpan." Þetta telst frábær árangur hjá Sesselju þar sem allir keppendur voru mjög góðir og flestir meistarar í sínum löndum, en þetta var fyrsta keppni Sesselju í fitness.

Sesselja Sif, sem hefur æft fimleika í um sex ár, er að sögn Sigurðar ákveðin í að taka þátt í næsta heimsmeistaramóti barna í fitness sem fram fer í Mexíkó á næsta ári. „Í þessum rútínum eru engar skylduæfingar líkt og í fimleikum heldur fá þær frjálsar hendur hvað það varðar. Sesselja er bæði mjög skapandi og dugleg að æfa sig og ég tel að hún eigi eftir að ná langt í íþróttinni. Árangur hennar á mótinu lofar í það minnsta góðu." Aðspurður segir Sigurður að mikill íþróttaáhugi ríki á heimilinu og að lífið snúist mikið í kringum hreysti og hreyfingu. „Við Kristín eigum samtals sjö börn, ég á fjögur og hún þrjú, og mörg þeirra stunda einhvers konar íþróttir. Við leggjum mikið upp úr því að vera heilbrigð og borða hollt og æfum mjög mikið, sumum finnst það kannski of mikið," segir Sigurður að lokum og hlær.