Í spilun á 95 útvarpsstöðvum

„Ég spilaði nokkra tónleika í Bandaríkjunum í júní og eyddi tveimur dögum í að troða diskum í umslög og senda á útvarpsstöðvar. Nú er það að skila sér,“ segir Sunna Gunnlaugsdóttir, djasspíanisti.

Plata hennar The Dream, hefur fengið góðar viðtökur í Bandaríkjunum og Kanada. Þar er hún í spilun á yfir 95 útvarpsstöðvum og hefur náð inn á vinsældarlista í báðum löndunum, þar á meðal 15. sæti á CMJ-listanum í Bandaríkjunum.

„Þetta hefur verið alveg frábært og ég er búin að gefa símaviðtöl við útvarpsstöðvar víða um Bandaríkin,“ segir Sunna. „Það óvenjulegasta er að ég fékk bréf frá plötusnúð einum í KXLU-útvarpsstöðinni í Los Angeles,“ bætir hún við. „Þar sagðist hann vera mjög hrifinn af plötunni og líka vel við melódísku tónlistina.“

Sunna fjármagnaði plötuna að hluta til í gegnum síðuna Kickstarter þar sem fólk gat heitið vissum upphæðum á hana gegn því að fá áritaða plötu, stuttermabol, iPod Nano og annan varning. Hún náði markmiði sínu sem var 2.500 dollarar, eða tæpar þrjú hundruð þúsund krónur, og platan kom út í Bandaríkjunum 17. júní og hér heima í ágúst.

Hægt er að hlusta á plötuna á síðunni Sunnagunnlaugs.bandcamp.com og kaupa hann í verslunum, á síðunni Sunnagunnlaugs.com og víðar. -fb