Vinsæll Clooney

George Clooney hefur augljóslega mikið aðdráttarafl því nýjasta kvikmynd hans, The American, fór rakleiðis á toppinn í Bandaríkjunum um síðustu helgi.

Þetta verður að teljast nokkuð góður árangur því Clooney er hugsanlega eini leikarinn sem hið venjulega meðaljón kannast við úr leikaralistanum. Þar að auki er leikstjórinn Anton Corbijn blautur á bak við eyrun þegar kemur að kvikmyndagerð; er hugsanlega þekktastur fyrir að gera myndbönd hljómsveita á borð við U2, Metallicu og Depeche Mode.

Í öðru sæti varð síðan blóðbaðs-tryllirinn Machete í leikstjórn Robert Rodriguez en fast á hæla hennar komu Takers með Matt Dillon og hryllingsmyndin The Last Exorcism. Rómantíska kvikmyndin Going the Distance með Drew Barrymore olli hins vegar miklum vonbrigðum og náði eingöngu fimmta sætinu.