Mottukeppni fyrir þá allra hörðustu - Tom Selleck keppnin á Boston

Styrktarátakið Mottu-mars hefur vakið gríðarlega athygli undanfarið og náði hámarki á föstudaginn síðasta. En það sem færri vita er að átakið á sér fyrirmynd, sem er hin alræmda Tom Selleck keppni.

Keppni þessi var haldin árlega fyrir nokkrum árum, en lagðist af um það leyti sem sem skemmtistaðurinn Sirkus hætti.

Síðan þá hafa aðstandendur keppninnar legið í dvala og sumir átt erfitt með að fóta sig í lífinu. Mikil naflaskoðun hefur átt sér stað og mikið tómarúm hefur verið í sálum þessa fólks. Það var því vakning hjá þeim þegar að Krabbameinsfélagið blés í lúðra og skipaði karlpeningi þessarar þjóðar að safna mottu og ákváðu aðstandendur að henda í eina keppni, „mottumars" til heiðurs.

Ef að þú vilt keppa og telur þig vera með mottu þess verða, skaltu mæta á Boston, biðja starfsmann um umsóknareyðublað og skrá þig. Hægt er að skrá sig til klukkan 20. mánudaginn 29. mars.

Kynnir keppninnar að þessu sinni er Þorsteinn Guðmundsson en hann er frægastur fyrir uppistand og barngæsku. Hann skartar líka fallegu yfirvaraskeggi. Þorsteinn hannaði reyndar fermingarkirtilinn... en það er önnur saga.

Þrír landsfrægir einstaklingar skipa dómnefnd, sem velur það yfirvaraskegg sem er eiganda sínum til mestrar prýði og þykir bera af í þokka og útgeislun.

Dómnefnd velur fyrsta, annað og þriðja sætið og einnig hýjung ársins. Keppendur velja svo sjálfir vinsælasta strákinn.

Ef að keppnin fyllist (30 manns+) fyrir 29. mars, fer fram úrdráttur að kvöldi 29. mars. Fyrstu 15 eru þó öruggir í keppni. Þeir sem sækja um eftir 15. umsækjanda eiga á hættu að lenda í pottinum þ.e.a.s ef að umsóknir fara yfir 30 manns. Það borgar sig s.s. að vera tímanlega - 2 vikur í keppni!

Ágóði af sölu kvöldsins rennur til Krabbameinsfélagsins.