Sandra í hasar með unnusta Scarlett

Bandaríska leikkonan Sandra Bullock hefur ekki átt sjö dagana sæla eftir að hún hlaut Óskarinn og þar af leiðandi bölvun styttunnar líka. Eiginmaður hennar átti heilan her af hjákonum og Sandra hefur lítið látið á sér bera.

Nú heyrast þær fréttir frá Hollywood að Sandra og Ryan Reynolds, þekktastur fyrir að vera kærasti Scarlett Johansson, ætli að leika saman í hasarmynd sem ber heitið Most Wanted. Sandra og Scarlett vöktu mikla athygli á MTV-verðlaununum þegar þær kysstust innilega á munninn og nú er spurning hvort Sandra fái að kyssa unnustann líka.

Empire Online greinir frá þessu og bætir við að hasargamanmyndir með bæði kynin í aðalhlutverki njóti sífellt meiri hylli. Nægir þar að nefna Bounty Hunter með Gerard Butler og Jennifer Aniston í aðalhlutverkum og Knight and Day með Cameron Diaz og Tom Cruise. Til gamans má nefna að sama fólk og gerði síðarnefndu myndina stýrir Most Wanted.