Segir skilið við Epic

Leik- og söngkonan Jennifer Lopez hefur sagt skilið við útgáfufyrirtæki sitt, Epic Records, sem er í eigu Sony. Ekki er víst hvort hún var látin fjúka eða hvort samningurinn var einfaldlega útrunninn.

„Jennifer og Sony Music Group hafa átt gott samstarf,“ sagði umboðsmaður Lopez. „Þau hafa átt góðar stundir saman en kominn var tími á breytingar sem henta ferli hennar betur sem leikkonu og tónlistarmanni.“ Hún mun á næstunni undirrita samning við annað útgáfufyrirtæki og er sjöunda hljóðversplata hennar væntanleg á vegum þess í apríl.