Óttasleginn Jude Law

Fyrrum eiginkona leikarans Jude Law, hönnuðurinn Sadie Frost, hefur unnið að útgáfu ævisögu sinnar undanfarna mánuði og mun Frost meðal annars ætla að fjalla um hjónaband sitt við Law. Þetta mun hafa komið illa við Law sem óttast að frásagnirnar muni skaða ímynd hans. „Hann hefur beðið Sadie um að segja honum nákvæmlega hvað hún hyggst skrifa um hann. Hann óttast að sumt af því sem mun koma fram í bókinni geti skaðað ímynd hans og komið börnum þeirra í uppnám,“ var haft eftir heimildarmanni.

Þeir sem standa að útgáfu bókarinnar segja Frost fyrst og fremst ætla að einblína á uppvaxtarár sín og feril sinn sem hönnuð og ekki á fyrrum eiginmann hennar eða nána vini, en Frost er góð vinkona ofurfyrirsætunnar Kate Moss og Stellu McCartney, dóttur Bítilsins.