Icelandair: Gert ráð fyrir lokun Keflavíkurflugvallar næstu tvo sólarhringa

Icelandair hefur sett upp flugáætlun sína fyrir næsta tvo sólarhringa og miðar hún við áframhaldandi lokun Keflavíkurflugvallar. „Laugardag 24. apríl og sunnudag 25. apríl verður flugvöllurinn í Glasgow því miðstöð millilandaflugs Icelandair," segir í tilkynningu frá félaginu.

Flugvélar Icelandair fljúga þaðan til og frá New York og Boston í Bandaríkjunum og til og frá Kaupmannahöfn, Osló, Amsterdam og London í Evrópu. „Tvisvar á dag er síðan flogið með farþega milli Glasgow og Akureyrar," segir ennfremur. „Því má segja að þeir sem fara til og frá Íslandi með Icelandair um helgina muni millilenda í Glasgow."

Félagið hvetur farþega til þess að fylgjast vel með því hvernig flugi Icelandair til og frá landinu verður háttað því nauðsynlegt getur reynst að gera breytingar með skömmum fyrirvara. Farþegar eru hvattir til þess að fylgjast með fréttum og upplýsingum um flugáætlun, komu og brottfarartíma fluganna, m.a. á www.icelandair.is.

Þá segir að þjónustuver Icelandair verði opið um helgina en Icelandair hefur undanfarna daga unnið að viðbúnaðaráætlun ef til þess kæmi að Keflavíkurflugvelli yrði lokað vegna öskufallsins frá eldgosinu í Eyjafjallajökli.

„Í undirbúningunum hefur verið lögð áhersla á að halda starfsemi félagsins gangandi, halda opnum flugsamgöngum milli Íslands og umheimsins og veita viðskiptavinum þjónustu. Áhafnir, tæknimenn, stjórnendur og þjónustufulltrúar eru komnir til Glasgow og munu vera þar starfandi eins lengi og þörf krefur."