Tangó og kirkjusmellir

Fjölbreytileg tónlist eins og argentínskur tangó og barrokktónlist mun hljóma á tónlistardögunum Músík í Mývatnssveit sem haldnir verða í tólfta sinn nú um páskana.

Laufey Sigurðardóttir fiðluleikari hefur umsjón með Músík í Mývatnssveit. Hátíðin er nú haldin í tólfta sinn og hefur Laufey haft veg og vanda af henni frá upphafi.

Tvennir tónleikar verða á hátíðinni og eru þeir með allólíku sniði. Fyrri tónleikarnir verða haldnir í Skjólbrekku að kvöldi skírdags klukkan 20. Þar verða fluttir bæði argentínskir tangóar eftir Piazolla og þekkt íslensk dægurlög. „Þetta er önnur áhersla en við erum vön og í fyrsta sinn sem við erum með tangó á efnisskránni,“ segir Laufey þegar hún spurð að því hvort áður hafi verið leikinn tangó á Músík í Mývatnssveit. „Við settum saman tangóhljómsveit að fyrirmynd Piazzolla og erum með kornungan skagfirskan harmónikkuleikara, Jón Þ. Reynisson, í hópnum. Það er óneitanlega annar litur á efnisskránni þegar við erum með harmónikku,“ segir Laufey.

Á föstudaginn langa verða tónleikar í Reykjahlíðarkirkju klukkan 21. Þar verður flutt tónlist sem hæfir stund og stað. „Við veljum tónlist sem er miklu hátíðlegri,“ segir Laufey um síðari tónleikana. Flutt verður barrokktónlist eftir Bach og Corelli, og Gissur P. Gissurarson tenór syngur tvo sálma eftir Hallgrím Pétursson. „Við verðum líka með kirkjusmelli eins og Kirkjuaríuna eftir Stradella og Agnus Dei eftir Bizet.“

Laufey segir hátíðina Músík í Mývatnssveit hugsaða sem mótvægi við þá útivistarmöguleika sem í boði eru í Mývatnssveit um páskana en þangað leggur fjöldi manna leið sína um hverja páska meðal annars til að ganga píslargöngu kringum Mývatn á föstudaginn langa. „Tímasetning tónleikanna í Reykjahlíðarkirkju miðast við fólkið sem búið er að ganga kringum vatnið. Það nær að fá sér að borða áður en það kemur á tónleikana.“

Laufey bendir á að tónlistardagarnir séu lóð á vogarskálarnar til að lengja ferðamannatímann. „Ég er svo hrifin af hagvextinum.“

Flytjendur auk Laufeyjar, Jóns og Gissurar, eru Hávarður Tryggvason sem leikur á kontrabassa, Kristinn H. Árnason gítarleikari og Aladár Rácz sem leikur á píanó og orgel.