Swift og Gyllenhaal saman í London

Leikarinn Jake Gyllenhaal og sveitasöngkonan Taylor Swift hafa sést nokkuð oft saman undanfarnar vikur og velta bandarísk slúðurblöð því nú fyrir sér hvort þarna sé á ferðinni næsta ofurpar Hollywood.

Swift er nú á tónleikaferðalagi um heiminn til að kynna nýja plötu sína, Speak Now, og átti stúlkan að halda tónleika í London í síðustu viku. Stúlkan mætti þó örlítið fyrr til borgarinnar svo hún gæti eytt tíma með Gyllenhaal sem var sjálfur staddur í London á þeim tíma. „Þau eru greinilega par. Þau eyddu helginni saman inni á hótelherberginu sínu,“ var haft eftir heimildarmanni. Þetta ku einnig vera fjórða helgin í röð sem parið eyðir saman.

„Þau pöntuðu sér nóg fyrir tvo eða jafnvel þrjá uppi á herbergi,“ er haft eftir einum hótelstarfsmanni sem bætti því þó við að engum hefði tekist að sjá þau saman. Heimildarmenn úr röðum Gyllenhaal og Swift segja þau vera skotin í hvort öðru og hún vilji gera sambandið opinbert.