Óttar með hjartaknúsara á tökustað

Óttar Guðnason kvikmyndatökumaður má búa sig undir mikla ásókn ungra kvenna á nýjasta tökustaðinn sinn. Óttar, sem hefur verið ráðinn tökumaður kvikmyndarinnar Love, Wedding, Marriage, getur vænst þess að paparazzar mun sitja um aðalleikara myndarinnar sem heitir Kellan Lutz. Ef til vill hringir þetta nafn engum bjöllum hjá karlkyns lesendum Fréttablaðsins en aðdáendur Twilight-kvikmyndanna ættu að kveikja á perunni því hann leikur Emmet Cullen, vampírubróður Edwards Cullen, í þessum ofurvinsæla kvikmyndaflokki.

Samkvæmt erlendum fréttamiðlum eiga tökur að hefjast hinn 19. apríl í Louisiana en leikstjóri myndarinnar er leikarinn Dermot Mulroney og er þetta fyrsta leikstjóraverkefni hans. Óttar og Dermot hafa áður unnið saman því Mulroney lék aðalhlutverkið í kvikmyndinni Inhale eftir Baltasar Kormák sem Óttar tók einnig upp. Fjármögnun myndarinnar hefur gengið nokkuð brösuglega ef marka má það sem bandarískir kvikmyndavefmiðlar hafa skrifað um hana en þau mál hafa víst verið leyst. Upphaflega stóð þó til að Christopher Walken og Jessica Alba yrðu í helstu hlutverkum en í stað þeirra eru nú komin þau Mandy Moore, Jane Seymour og James Brolin, eiginmaður Barböru Streisand. Sumar vefsíður vísa því þó ekki á bug að Alba muni bætast í hópinn.- fgg