Sár að fá ekki að ganga í hælaskóm

Tennisstjarnan Serena Williams, 28 ára, var gjörsamlega miður sín að eigin sögn þegar hún slasaðist á fæti fyrr á þessu ári af því að þá gat hún ekki gengið um á hælaskóm.

Tennisstjarnan slasaðist stuttu eftir að hún sigraði Wimbledon mótið í júlí og þurfti að hvíla sig á meðan hún náði fullum bata. Hún var leið yfir því að geta ekki æft en enn sárari yfir því að geta ekki gengið í uppáhaldsskónum sínum.

„Þegar ég slasa mig verð ég döpur því þá get ég ekki verið í hælaskóm. Ég er nánast gráti næst yfir því," sagði Serena í viðtali við SOBeFiT tímaritið.

Serena elskar tísku og hefur meðal annars hannað fatalínu fyrir Nike og Puma ásamt því að hanna og markaðssetja eigin fylgihlutalínu.