Pete Doherty grunaður um að hafa orðið stúlku að bana

Dópistinn, söngvarinn í Babysamble og vitleysingurinn Pete Doherty, var handtekinn um helgina grunaður um að hafa útvegað Robin Whitehead fíkniefni sem drógu hana til dauða í janúar. Robin var 27 ára gömul þegar hún lést en hún var að gera heimildarmynd um líf Pete. Meðal annars um ástarsambandið sem hann átti við ofurfyrirsætuna Kate Moss.

Hún fannst svo látin í lok janúar í íbúð bestar vinar Doherty, Pete Wolfe, sem er 41 árs gamall. Honum hefur meðal annars verið kennt um fíkniefnaneyslu Dohertys. Þá rannsakaði lögreglan mál gegn Wolfe þar sem mynd náðist af honum að sprauta unglingsstúlku. Doherty hélt því fram að Wolfe hefði verið að draga blóð úr stúlkunni en ekki sprauta hana með heróíni.

Wolfe hefur einnig verið handtekinn vegna málsins, meðal annars fyrir að hindra framgang réttvísinnar. Hann laug að lögreglunni að Robin hefði ekki neytt fíkniefna áður en hún lést. Raunar sagði hann að hún hefði ekki smakkað neitt sterkara en te daginn sem hún lést. Þetta reyndist að sjálfsögðu tómt rugl.

Félagarnir ógæfulegu sæta rannsókn fyrir að vera ábyrgir fyrir dauða konunnar.