Lausn fundin á Hobbitanum

Íbúar Nýja-Sjálands önduðu margir hverjar léttar í gær þegar forsætisráðherra landsins, John Key, tilkynnti að samningar hefðu náðst milli ríkisstjórnarinnar og kvikmyndafyrirtækisins Warner Bros. Það er því ljóst að tökur á tveimur myndum upp úr Hobbitanum, forleiknum að Hringadróttinssögu, geta hafist í febrúar á næsta ári eins og ráðgert hafði verið.

Warner Bros. hafði hótað að fara með myndina úr landi ef fyrirtækið fengi ekki betri skattaívilnanir og vinnulöggjöfinni yrði breytt. Ríkisstjórnin féllst á það enda um ógnarstórt verkefni að ræða; talið er að um tvö þúsund Ný-Sjálendingar fái vinnu við gerð myndarinnar auk þess sem framleiðslan kemur með nokkrar krónur inn í hagkerfi landsins. Andy Serkis, sem er þekktastur fyrir hlutverk Gollris í Hringadróttinssögu, sagði í samtali við fjölmiðla áður en samningur var í höfn að það yrðu mikil vonbrigði ef myndin yrði ekki tekin upp í landinu.

Aðdáendur þessarar vinsælu bókar geta því farið að hlakka til. Martin Freeman hefur verið ráðinn í hlutverk Bilbó Bagga og Peter Jackson mun leikstýra myndinni en upphaflega hafði verið gert ráð fyrir að Guillermo del Toro myndi sitja í leikstjórastólnum. Framleiðsla myndarinnar hefur tafist töluvert sökum deilna við verkalýðsfélög og erfiðleika við fjármögnun en nú virðist allt vera að smella saman.

- fgg