700 milljóna landkynningarátakið komið á fullt á Netinu

Viggo Mortensen, Stephen Fry og aðrir heimsþekktir "Íslandsvinir" leggja Íslandi lið í 700 milljón króna landkynningarátakinu sem tilkynnt var á ferðamálaþingi fyrr í þessum mánuði.

Átakið er sérstaklega hugsað til þess bæta ímynd Íslands í kjölfar eldgossins í Eyjafjallajökli en það hefur sett stórt strik í reikninginn hjá íslenskum ferðaþjónustuaðilum.

Fry "twittaði" á Twitter gegnum Facebook-síðuna Inspired by Iceland, sem er hluti af þessu átaki, og tilkynnti lesendum sínum að þrátt fyrir allt sem fólk héldi um Ísland þá væri landið enn þá jafn spennandi og sjarmerandi og alltaf. Fry er einn frægasti leikari Bretlands og nýtur mikillar virðingar í föðurlandi sínu. Á heimasíðunni Inspired by Iceland mátti svo í gær sjá viðtal við Viggo Mortensen þar sem hann dásamar land og þjóð.

Að sögn Einars Karls Haraldssonar, fulltrúa iðnaðarráðherra í þessu verkefni, stendur til að fá fleiri þekkta Íslandsvini til að taka þátt í að kynna landið.

„Þetta snýst auðvitað allt um að gefa rétta mynd af því hvernig ástandið á Íslandi raunverulega er," segir Einar en verkefninu verður formlega hleypt af stokkunum í flugskýli 4 á Reykjavíkurflugvelli í dag. Í stórum evrópskum fjölmiðlum á borð við Guardian munu birtast auglýsingar með einum eða öðrum hætti um stöðuna á Íslandi og vefmyndavélar verða settar upp á hinum og þessum stöðum sem ekki sýna öskumökk og eldgos heldur að lífið gangi sinn vanagang hér á Fróni.

Einar staðfesti jafnframt þann orðróm að verið væri að skoða möguleika á tónleikahaldi þar sem erlendar stjörnur í bland við íslenska tónlistarmenn kæmu fram en það mál væri enn á byrjunarreit. - fgg

Heimasíða Inspired by Iceland. Þar er talið niður í formlega opnun síðunnar í næstu viku

Facebook-síða Inspired by Iceland

Twitter-síða Inspired by Iceland

Vimeo-síða Inspired by Iceland

YouTube-síða Inspired by Iceland