Hvíldi kreditkortið þessi jól

„Þetta eru eiginlega fræðsluþættir um fjármál heimilanna, nema að reynt er að fjalla um efnið á mannamáli svo að allir skilji,“ segir leikstjórinn Baldvin Z um sjónvarpsþættina Ferð til fjár sem sýndir verða í Sjónvarpinu í byrjun næsta árs.

Í þáttunum verður fjallað um svokallað fjármálalæsi og verða ýmis hugtök og efni tengd fjármálum útskýrð á þann hátt að áhorfandinn hljóti dýpri skilning á efninu. „Það er algengt að fólk sitji og horfi á fréttir sem fjalla um fjármál en skilji ekki við hvað er átt. Þættirnir eiga í grunninn að útskýra orð og hugtök og í leiðinni kenna fólki hvernig megi nýta peningana betur,“ útskýrir Baldvin, sem vinnur þættina í samstarfi við Breka Karlsson og Steinunni Þórhallsdóttur, en hann rekur stofnunina Fjármálalæsi á Íslandi. Í þáttunum eru meðal annars ýmsir aðilar fengnir til þess að reikna út hvað þeir kosta og þeirra á meðal voru útvarpsmaðurinn Andri Freyr Viðarsson, leikarinn Björgvin Franz Gíslason og sjónvarpskonan Þóra Arnórsdóttir auk nokkurra menntskælinga og þingmanna.

„Þetta var mjög forvitnilegt því fólk kemst oft að því að það kostar meira en það heldur. Andri Freyr var á meðal þeirra sem kostuðu minnst, ég tók líka prófið í gamni og komst að því að ég var langdýrastur af öllum en það var fartölvunni minni að kenna. Hún sprengdi allan skalann,“ segir Baldvin og hlær.

Aðspurður segist hann hafa lært ýmislegt við gerð þáttanna og ákvað meðal annars að hvíla kreditkortið fyrir jólin í ár. „Þetta var mun auðveldara en ég hafði ímyndað mér og nú þarf ég ekki að kvíða janúarmánuði, aldrei þessu vant. Svo er bara að bíða og sjá hvort maður haldi þetta út allt næsta ár,“ segir hann að lokum.- sm