Tekjur lífeyrisþega lækka um þúsundir

Eldri borgarar sem fá greiðslur úr lífeyrissjóðum munu í flestum tilvikum verða fyrir umtalsverðri tekjuskerðingu þegar lífeyrissjóðirnir skerða greiðslur, þrátt fyrir hærri greiðslur frá Tryggingastofnun ríkisins.

Sé miðað við ellilífeyrisþega með 100 þúsund krónur á mánuði úr lífeyrissjóði getur tíu prósenta skerðing á lífeyrisgreiðslum þýtt að tekjur lækka um 5.500 krónur á mánuði, úr 181 þúsund krónum í 176 þúsund krónur. Aðeins þeir sem eru með um eða undir 40 þúsund krónum á mánuði úr lífeyrissjóði fá skerðinguna til baka að fullu með hærri greiðslum frá Tryggingastofnun.

Flestir af stærstu almennu lífeyrissjóðunum áforma skerðingu á lífeyrisgreiðslum vegna slæmrar afkomu sjóðanna. Eins og fram hefur komið í Fréttablaðinu áformar Almenni lífeyrissjóðurinn 16,7 prósenta skerðingu, Lífeyrissjóður verzlunarmanna tíu prósenta skerðingu, og Gildi lífeyrissjóður sjö prósenta skerðingu á lífeyrisgreiðslum.

Skerðing á greiðslum frá lífeyrissjóðunum þýðir í flestum tilvikum að viðkomandi eiga rétt á hærri lífeyrisgreiðslum en áður frá Tryggingastofnun.

Erfitt er að segja fyrir um nákvæmlega hver tekjuskerðing eldri borgara og öryrkja verður, enda munu sjóðirnir skerða greiðslur mismikið.

Í dæmum sem starfsmenn Tryggingastofnunar hafa reiknað út má sjá að heildartekjur ellilífeyrisþega sem býr með öðrum og fær í dag 100 þúsund krónur á mánuði úr lífeyrissjóði, lækka um 5.500 krónur á mánuði, 3,0 prósent, skerði lífeyrissjóðurinn greiðslur til hans um tíu prósent. Lækki greiðslurnar um fimmtán prósent lækka heildartekjurnar um ríflega 8.250 krónur, eða 4,6 prósent.

Miðað við ofangreindar forsendur myndu því tekjur ellilífeyrisþegans lækka úr ríflega 181 þúsundum króna á mánuði í tæplega 176 þúsund krónur ef skerðingin nemur tíu prósentum. Verði skerðingin fimmtán prósent lækka tekjurnar úr ríflega 181 þúsund í tæplega 173 þúsund krónur á mánuði.

Tekjulækkunin verður því meiri, bæði hlutfallslega og í krónutölu, því hærri sem greiðslurnar úr lífeyrissjóði eru.

Ef ellilífeyrisþegi sem býr með öðrum er með 200 þúsund krónur úr lífeyrissjóði, sem skertar eru um tíu prósent, lækka heildartekjur hans úr ríflega 236 þúsund krónum á mánuði í ríflega 225 þúsund krónur. Skerðist greiðslur frá lífeyrissjóði um fimmtán prósent fara tekjurnar úr ríflega 236 þúsundum í tæplega 220 þúsund á mánuði.

Fleiri dæmi má sjá í meðfylgjandi töflu, sem byggir á útreikningum starfsmanna Tryggingastofnunar.

Þess ber að geta að til að fá auknar greiðslur frá Tryggingastofnun vegna skerðinga á greiðslum frá lífeyrissjóðunum verða lífeyrisþegar að setja sig í samband við Tryggingastofnun. Þó er verið að kanna hvort mögulegt sé að leiðrétta núgildandi greiðsluáætlun lífeyrisþega í samráði við lífeyrissjóðina. Ekki er ljóst hvort af því getur orðið, samkvæmt upplýsingum frá Tryggingastofnun.brjann@frettabladid.is