Túlkaði fyrir fyrirsætur í Sjanghæ

Fyrirsætan Anna Jia keppti fyrir hönd Íslands í Elite-fyrirsætukeppninni sem fram fór í Sjanghæ síðastliðinn sunnudag. Hún vakti mikla athygli fjölmiðla og var meðal annars fylgt eftir af franskri sjónvarpsstöð.

„Ferðin út var mjög skemmtileg og hótelið sem við gistum á var eitt það flottasta sem ég hef séð," segir Anna Jia um ferðina út. Faðir hennar er kínverskur og því var hún ekki að heimsækja landið í fyrsta sinn. „Ég var í raun ekki bara að fara út að keppa heldur einnig að hitta fjölskyldu mína sem flaug frá Peking til að hitta mig," segir Anna Jia sem átti auðvitað ekki í neinum vandræðum með tungumálið heldur. „Ég átti ekki í neinum tungumálaörðugleikum og í lokin var ég farin að vinna sem túlkur fyrir aðra þarna," segir hún og hlær.

Anna Jia var ein af fjórum stúlkum sem frönsk sjónvarpsstöð fylgdi eftir alla keppnina og segir hún það hafa komið sér ágætlega. „Það var fínt og fólk tók meira eftir manni fyrir vikið. Það skipti ekki mestu máli að sigra heldur líka að byggja upp sambönd, vekja á sér athygli og bóka verkefni," útskýrir hún. Anna Jia komst ekki í fimmtán manna úrslit en þrátt fyrir það var henni boðið að taka þátt í myndatöku fyrir kínverska Elle ásamt fimmtán efstu stúlkunum.

Anna er á sínu öðru ári í Menntaskólanum í Reykjavík og segist kunna vel við sig þar. Hún er ákveðin í að ljúka stúdentsprófi þrátt fyrir fyrirsætuferilinn. „Eins og er vil ég einbeita mér að því að klára skólann. En ef mér bjóðast góð tækifæri innan bransans þá er það eitthvað sem ég er tilbúin til þess að prófa." - sm