Flutt meðvitundarlaus á gjörgæsludeild

Þremenningarnir sem fluttir voru á slysadeild Landspítalans í Fossvogi í morgun hafa allir verið fluttir meðvitundarlausir á gjörgæsludeild. Þau eru öll í öndunarvél og öll alvarlega slösuð.

Eins og fréttastofan greindi frá í morgun voru fjögur ungmenni flutt á sjúkrahús eftir að bíll valt við Mánatorg norðan við Keflavík um hálfsjöleytið í morgun. Í bílnum voru þrjár stúlkur og einn piltur. Öll eru þau rétt undir tvítugu. Þrjú þeirra voru flutt á slysadeild Landspítalans í Fossvogi en eitt á sjúkrahús í Keflavík, að sögn lögreglunnar á Suðurnesjum.

Ekki hafa fengist nánari upplýsingar um tildrög slyssins.