Rándýr retta hjá Damon

Damon Albarn, maðurinn á bak við Gorillaz, gæti verið í vondum málum eftir að hann kveikti sér í sígarettu á tónleikum með sveitinni. Gorillaz-tónleikarnir voru haldnir á reyklausum bar í Portsmouth. Damon verður að líkindum sektaður fyrir uppátækið og gæti sektin numið allt að hálfri milljón íslenskra króna.

Reykingar Damons hafa valdið miklum usla meðal baráttuhópa gegn reykingum. Einn úr þeirra hópi sagði við Daily Mirror: „Það er engin afsökun fyrir þessari hegðun og lögin eru mjög skýr. Ég býst við að yfirvöld grípi til viðeigandi aðgerða. Verst eru samt skilaboðin sem þetta sendir til aðdáenda. Þessi hegðun er mjög óábyrg.“