Bretar standa með Beckham

Bandaríska tímaritið In Touch birti í gær forsíðufrétt um að David Beckham hefði átt næturgaman með tveimur vændiskonum, borgað þeim háar summur fyrir kynlífsleiki og hitt aðra þeirra aftur. Bretar segja málið lykta af ofsóknum og telja það samsæri gegn þjóðinni.

Samkvæmt In Touch á David Beckham að hafa hitt vændiskonuna Irmu Nichi í ágúst 2007 á Le Parker Meridien-hótelinu í New York. Samkvæmt heimildum blaðsins á Beckham að hafa greitt henni 3.200 pund, eða tæpa hálfa milljón, fyrir þjónustu sína. Önnur vændiskona hafi síðan bæst í hópinn en henni er lýst sem lögulegri og brúnhærðri snót. Beckham á að hafa greitt Irmu aðra eins fjárhæð fyrir að gista um nóttina og svo hafi þau hist aftur í London á Claridge-hótelinu mánuði seinna. Breska blaðið The Sun greinir frá því að Irma þessi hafi verið einn af skjólstæðingum hórumömmunnar Kristin Davis sem gerði allt brjálað í New York þegar upp komst um svörtu bókina hennar en í henni voru geymd öll nöfn heimsfrægra viðskiptavina á borð við Eliot Spitzer, þáverandi ríkisstjóra New York-ríkis.

Samkvæmt The Sun logar nú allt í Bretlandi en þeir hafa tekið upp hanskann fyrir Beckham. Sumar samsæriskenningar á spjallborðum í Bretlandi ganga svo langt að þetta sé vopn Þjóðverja gegn því að England fái að halda HM í knattspyrnu 2018. En Beckham er talsmaður þess verkefnis fyrir hönd Englands. Á það hefur nefnilega verið bent að útgáfufélag In Touch, Bauer, sé þýskt en Þjóðverjar hafa líka sóst eftir því að fá að halda umrætt mót.

The Sun hefur eftir nánum vini Beckham-hjónanna að þau séu merkilega róleg yfir málinu, þau séu meira undrandi á því að blaðið skuli hafi birt fréttina án þess að hafa nokkrar sannanir. Blaðið greinir frá því að Bert Deixler, bandarískur lögfræðingur og sérfræðingur í meiðyrðamálum, hafi verið fenginn til að höfða mál á hendur In Touch. Lögfræðingaher undir stjórn Gerrard Tyrrell mun stjórna málinu á Bretlandi og svo hefur verið safnað saman öllum helstu lögfræðingum Þýskalands til að sækja mál gegn útgefandanum. Hvað sannleiksgildi fréttarinnar varðar bendir vinur Beckham-hjónanna á að leikmaðurinn hafi vissulega verið í New York á umræddum tíma, hann hefði gist á Waldorf-hótelinu.

freyrgigja@frettabladid.is