Harry og Heimir hættir - í bili

Þeir félagar Sigurður Sigurjónsson, Karl Ágúst Úlfsson og Örn Árnason kveðja hlutverk sín í Harry og Heimi nú í lok mars eftir sjö mánuði fyrir fullu húsi. Það er hundraðasta sýning í kvöld á þessu vinsæla útvarpsleikriti og hafa hátt í tuttugu þúsund áhorfendur séð það frá í haust.

Þeir voru búnir að lofa sér í önnur verkefni nú í mars og því voru ekki önnur úrræði nú en að hætta sýningum svo næstu verkefni komist á svið. En þeir félagar eru ekki hættir heldur mæta galvaskir næsta haust og taka upp þráðinn þar sem frá var horfið. Örn og Sigurður eru komnir á fullt í ný verkefni í Borgarleikhúsinu og frumsýna á stóra og nýja sviði Borgar-leikhússins á næstu vikum. Örn í hlutverki skólastjórans í Gauragangi í næstu viku og Sigurður leikur undirförulan sálfræðing í Dúfunum sem frumsýnt verður í apríl á nýja sviðinu.

Enginn átti von á því að Harry og Heimir myndu ganga í sjö mánuði fyrir fullu húsi en sú varð raunin og verður leikritið tekið upp næsta haust svo þeir sem komast ekki að núna fái að hlæja að þeim félögum sem fara á kostum í hlutverkum sínum í verkinu. - pbb