Jói Fel er fyrirmynd Magga Mix

Magnús Valdimarsson, öðru nafni Maggi Mix, hefur slegið í gegn á Netinu með skemmtilegum matreiðslumyndböndum sínum og á nú yfir þrjú þúsund aðdáendur á samskiptasíðunni Facebook. Magnús segist hafa kosið nafnið Maggi Mix því honum hafi þótt nafnið bæði skemmtilegt og grípandi.

Í þáttum sínum kennir Magnús fólki að matreiða einfalda og ódýra rétti og sér hann sjálfur um að taka efnið upp og setja á Netið. „Eldamennskan er bara áhugamál og mig langaði að deila nokkrum uppskriftum með landanum. Þetta byrjaði bara með einu myndbandi fyrir þremur vikum sem varð svo vinsælt að ég ákvað bara að halda áfram. Ég fékk póst um daginn frá konu sem er búsett á Nýja-Sjálandi sem hrósaði mér fyrir framtakið og það virkar mjög hvetjandi á mig og fær mig til að vilja halda áfram," útskýrir Magnús.

Magnús heimsótti útvarpsmennina Frosta Logason og Þorkel Mána Pétursson í útvarpsþátt þeirra Harmageddon á X-inu í gærdag þar sem hann ræddi við þá um matreiðsluþættina. „Ég hlusta mikið á Harmageddon og finnst þeir mjög skemmtilegir og það var gaman að hitta þá í eigin persónu. Þeir höfðu þó hvorugir prófað að elda neitt eftir mér enn þá, en þeir gera það kannski bráðum," segir Magnús og hlær.

Aðspurður segir hann sjónvarpskokkinn Jóa Fel vera í miklu uppáhaldi og segist hann helst horfa á matreiðsluþætti hans. „Mér finnst Jói Fel alltaf vera hress og skemmtilegur og það er gaman að horfa á hans þætti. Hann er samt með mjög flotta rétti sem efnaminna fólk hefur kannski ekki efni á að gera á meðan ég geri einfalda og mjög ódýra rétti," segir Magnús að lokum. - sm