Hera vaknaði öskrandi í jarðskjálftanum

Söngkonan Hera Hjartardóttir er búsett í bænum Christchurch á Nýja-Sjálandi ásamt manni sínum, Hirti Arasyni, og urðu þau heldur betur vör við hinn mikla jarðskjálfta sem reið yfir bæinn um helgina og var um 7,0 á Richter. Hera segir að stemningin í bænum sé skrýtin, eyðileggingin mikil og í raun ótrúlegt að ekkert mannfall hafi orðið.

„Ég vaknaði öskrandi um fjögur um nóttina við að allt skalf og nötraði. Það var eins og verið væri að ráðast á húsið okkar. Hélt að það væri bara eitthvað gengi komið og væri að berja húsið að utan,“ segir Hera Hjartardóttir söngkona þegar Fréttablaðið náði tali af henni en þá var símasamband óvenjulega gott en það hefur verið stopult síðan jarðskjálftinn reið yfir heimabæ hennar Christchurch í Nýja-Sjálandi á laugardaginn.

Hera og maður hennar, Hjörtur Arason, hlupu strax út úr húsinu og þá blasti eyðileggingin við. „Það er rosalegt að sjá bæinn og sérstaklega miðbæinn en þar skemmdist mikið. Það er samt mjög tilviljanakennt allt saman.

Til dæmis er ein matvörubúð sem eyðilagðist algjörlega á meðan það brotnuðu bara tvær flöskur í áfengisbúðinni sem er við hliðina,“ segir Hera og bætir við að elstu húsin í bænum hafi skemmst mest og ásýnd bæjarins muni breytast mikið eftir að búið er að endurnýja. „Það er samt ekki mikið hægt að gera strax því menn búast við öflugum eftirskjálftum næstu mánuðina.

Í nótt voru fimm eftirskjálftar svo maður sefur ekki mikið á nóttunni,“ segir Hera þakklát fyrir að þau sluppu vel úr skjálftanum en það brotnuðu bara nokkur glös og diskar hjá henni.

Hera söng í gær í gamla skólanum sínum en þar er búið að koma einhverjum af þeim 100.000 manns fyrir sem misstu heimili sín í náttúruhamförunum. „Það var mjög falleg og skrýtin upplifun í senn. Þetta var meira eins og ein stór útilega þar sem fólk var klappandi hvað öðru á bakið,“ segir Hera og vill meina að mikill samhugur hafi skapast meðal bæjarbúa en um 400.000 búa í bænum. „Þetta er rosaleg lífsreynsla og maður er enn þá frekar taugaveiklaður enda bíður maður bara eftir næsta skjálfta.“

alfrun@frettabladid.is