Þorskastríðið núna á íslensku

Hæfileikakeppnin Þorskastríðið 2010 er hafin og er nú unnin í samvinnu við Rás 2. Sama form er á keppninni og áður nema nú er aðeins tekið við lögum með íslenskum textum.

„Þessi hugmynd kom upp og það leist öllum svo vel á að prófa þetta í ár. Þetta er tilraun til að hvetja hljómsveitir sem syngja á ensku í bílskúrnum hjá sér til að vippa textanum yfir á íslensku og taka þátt. Það verður gaman að sjá hvað kemur út úr því,“ segir Jón Þór Eyþórsson hjá útgáfufyrirtækinu Cod Music. „Mér finnst allt í lagi að hljómsveitir sem eru að byrja pæli aðeins í innanlandsmarkaðnum fyrst. Svo ef það kemur eitthvert tækifæri erlendis þá er að sjálfsögðu hægt að vippa textanum yfir á ensku.“

Eins og áður í Þorskastríðinu þurfa lögin að vera frumsamin. Aldur, tónlistarstefna og það hvort listamaður hafi áður gefið út skiptir ekki máli. Í verðlaun eru hljóðverstímar til að fullklára þrjú lög með upptökustjóra og mun Cod Music sjá um að markaðssetja lagið og hljómsveitina innanlands. Einnig verður sigurvegara stríðsins flogið út til Færeyja þar sem hann kemur fram á G-festival sem verður haldið 15. til 17. júlí. Sigurvegarinn fær sömuleiðis ársbirgðir af þorskalýsi eins og undanfarin ár en í fyrra bar Mysterious Marta sigur úr býtum.

Opið verður fyrir innsendingar á lögum til 24. apríl og verður sigurvegarinn kynntur í beinni útsendingu á Rás 2 30. apríl. - fb