Ágústa Eva við hlið Péturs í nýjum sjónvarpsþætti

„Ég hef aldrei leikið á móti Pétri Jóhanni áður og það er alveg ótrúlega gaman að vinna með honum," segir Ágústa Eva Erlendsdóttir. Hún mun leika aðalhlutverkið á móti áðurnefndum Pétri í nýrri gamanþáttaröð sem verður sýnd á Stöð 2 í haust. Ágústa mun leika dularfulla konu sem keyrir út Sóma-samlokur en á sér annað og eilítið öðruvísi líf utan vinnutímans. Auk Ágústu hefur Vignir Rafn Valþórsson verið ráðinn til að leika starfsmann Hlemmavídeós sem þættirnir snúast um en persóna hans verður hálfgert hjarta leigunnar.

Leikhópurinn hefur hist nokkrum sinnum og æft en eins og Fréttablaðið hefur greint frá stendur einvalalið að handritinu; Sigurjón Kjartansson, María Reyndal, Ari Eldjárn, Hugleikur Dagsson og Pétur Jóhann. Þá hefur Styrmir Sigurðsson verið fenginn til að leikstýra þáttaröðinni en hann gat sér gott orð fyrir fyrstu Fóstbræðra-seríuna sem var frumsýnd 1997. Ágústa og Pétur hafa þó komið við sögu í sömu myndinni án þess að leika saman; Ágústa lék yngri útgáfuna af Bjarnfreði í kvikmyndinni Bjarnfreðarson.

Ágústa segir sér lítast mjög vel á þættina en vill ekki gefa of mikið upp um sína eigin persónu, það kæmi til með að ljóstra of miklu upp um framvinduna. Ágústa segist annars hafa eytt sumrinu í frí.

„Ég fór bara hringinn í kringum landið og svo hef ég bara verið að lemja í púða hjá Mjölni," segir Ágústa en dálæti hennar á bardagaíþróttum hefur vart farið fram hjá neinum. „Ég gerði alveg rosalega mikið af þessu fyrir kvikmyndina Borgríki og hef bara haldið áfram síðan þá," útskýrir Ágústa og vísar þar í myndina Borgríki eftir Ólaf Jóhannesson.

„Hún er í klippingu núna og verður frumsýnd á næsta ári." Ágústa verður raunar nokkuð áberandi því kvikmyndin Kurteist fólk eftir sama leikstjóra með Stefáni Karli verður frumsýnd seint á þessu ári.

freyrgigja@frettabladid.is