Emmy-verðlaunin komu á óvart

Emmy-verðlaunahátíðin fór fram í 62. sinn um helgina og var mikið um dýrðir að venju. Stjörnunar mættu í sínu fínasta pússi og létu mynda sig er þær gengu eftir rauða dreglinum sælar og sáttar. Hinir vinsælu sjónvarpsþættir Mad Men og Glee þóttu hvað sigurstranglegastir þetta árið og voru þeir tilnefndir í nokkrum flokkum.

Meðal þeirra sem tilnefndir voru til verðlaunanna í ár má nefna Claire Danes, gamanleikkonuna Tinu Fay, John Hamm og breska leikarann Hugh Laurie.

Sigurvegarar ársins voru aftur á móti leikkonan Edie Falco, sem var kosin besta gamanleikkonan, en hún fer með aðalhlutverkið í þáttunum Nurse Jackie, leikarinn Jim Parsons úr gamanþáttunum Big Bang Theory, leikarinn Bryan Cranston fyrir hlutverk sitt í dramaþáttunum Breaking Bad og Kyra Sedgwick fyrir hlutverk sitt í lögregluþáttunum The Closer.

Sjónvarpsþátturinn Mad Men var að mati margra sigurvegari kvöldsins en þættirnir hlutu verðlaun sem besta dramaserían og fyrir besta sjónvarpshandritið.