Upptökuliðið hvarf

Hljómsveitin Örför hefur gefið út sína fyrstu plötu. Hún hefur að geyma dægurlagarokk með íslenskum textum og er samstarfsverkefni Hek, eða Hauks Emils Kaaber, og G. Þorsteinssonar.

„Við spiluðum mikið síðasta sumar undir nafninu Hek og svo settum við saman í hljómsveit og fórum í upptökur,“ segir Haukur Emil. Upptökurnar gengu brösuglega enda stóðu þær yfir í heilt ár með mismunandi fólk við stjórnvölinn. „Fyrsta fólkið sem tók þetta upp hvarf og við vitum ekki enn hvar það er. Við höfum ekki fundið upptökurnar,“ segir Haukur. „Það var allt í einu slökkt á símanum hjá þeim og svo hættum við bara að reyna.”

Sá næsti sem tók við hljóðrituninni var Bjarki Jóhannsson sem hafði verið í upptökunámi í Hollandi. „Það gekk vel að vinna með honum,“ segir Haukur. „Ég held að það hafi verið í stjörnunum að við ættum að gera þetta aftur.“- fb